Արդյո՞ք օրինական ճանապարհով է արքայազն Հարին ամերիկյան վիզա ստացել. CNN

ԱՄՆ ներքին անվտանգության նախարարությունը պետք է մեկ շաբաթվա ընթացքում պարզի, թե ինչպես է դիտարկելու Մեծ Բրիտանիայի թագավոր Չառլզ III-ի որդու՝ արքայազն Հարիի ամերիկյան վիզա ստանալու մանրամասների վերաբերյալ վերլուծաբանական կենտրոնի հարցապնդումը: Այս մասին տեղեկացրել է CNN հեռուստաալիքը։

Նրա տվյալներով՝ Heritage Foundation վերլուծաբանական կենտրոնը պահանջում է ստուգել, թե արդյոք արքայազն Հարին օրինական ճանապարհով է ստացել ԱՄՆ-ում գտնվելու իրավունքը՝ հաշվի առնելով այն, որ նա  իր հուշերում խոստովանել է թմրանյութեր օգտագործելու մասին, ինչը կարող է հիմք հանդիսանալ նրան մերժելու համար։  Դաշնային դատավորը մեկ շաբաթ է տվել, որպեսզի պարզվի, թե ինչպես է նախարարությունն անելու դա։

Ինչպես նշել է պարբերականը, իրավապահները դիտարկում են այս գործը որպես ներքին անվտանգության նախարարության կողմից ամերիկյան օրենսդրության խախտման դեպքերի բացահայտման մասշտաբային ջանքերից մեկը։ 

«Այս գործը վերաբերում է արքայազն Հարիին, բայց կենտրոնացած է գերատեսչության վարքագծի դեմ»,- հեռուստաալիքը մեջբերել է Heritage Foundation-ի փաստաբան Ջոն Բարդոյի խոսքերը։

Ավելի վաղ արքայազն Հարին ինքնակենսագրականում, որն ստացել է Spare («Պահեստայինը») անվանումը, խոստովանել է, որ կոկաին է օգտագործել, երբ դեռ 17 տարեկան էր։ Հարին իր գրքում պատմել է, որ առաջին անգամ կոկաին փորձել է 2002թ. ամռանը, որսորդական ուիքենդի ժամանակ, իսկ հետագայում այդ թմրանյութն օգտագործել է էլի մի քանի անգամ։ Մինչ այդ տված հեռուստահարցազրույցում արքայազնը արդեն խոստովանել էր, որ երկար տարիներ խմել է եւ թմրանյութեր օգտագործել՝ փորձելով մեղմել մոր՝ արքայադուստր Դիանայի մահվան ցավը, որը զոհվել էր 1997թ. ավտովթարից։ 2002թ. բրիտանական ԶԼՄ-ները տեղեկացրել էին, որ 16-ամյա Հարին այցելել է թմրանյութերից կախվածություն ունեցողների վերականգնողական կլինիկա, այն բանից հետո, երբ հորը խոստովանել է, որ ակլոհոլ եւ մարիխուանա է օգտագործում։

Հիշեցնենք՝ երեկ՝ հունիսի 6-ին,  արքայազն Հարին ժամանել է Լոնդոնի դատարան, որտեղ քրեական գործ  էր քննվում` ընդդեմ Mirror թերթի՝ նրա մասին տեղեկությունների անօրինական հավաքագրման վերաբերյալ։