ՏԵՍԱՆՅՈՒԹ․ Փլուզվել է Կախովկայի հիդրոէլեկտրակայանի ամբարտակը
Փլուզվել է Խերսոնի մարզում գտնվող Կախովկայի հիդրոէլեկտրակայանի ամբարտակը։ Այս մասին ТАСС-ի հետ զրույցում հաստատել է Նովայա Կախովկայի քաղաքապետ Վլադիմիր Լեոնտևը։ Նրա խոսքով՝ հիդրոէլեկտրակայանի վրա գիշերային հարձակումները հանգեցրել են փականների ոչնչացմանը, ինչի հետևանքով ջուրը սկսել է անկառավարելի բաց թողնվել հոսանքն ի վար։ Լեոնտևը դա անվանել է «ամենալուրջ ահաբեկչական գործողությունը»:
Ամբարտակի փլուզման պատճառով Կախովկայի ՀԷԿ-ի մասնակի փլուզման մասին գրում է Интерфакс-ը՝ վկայակոչելով տեղական արտակարգ ծառայությունների ներկայացուցչին։ Նա պնդում է, որ գիշերը հիդրոէլեկտրակայանի վրա հարձակումներ չեն եղել։
Հունիսի 6-ի գիշերը Կախովկայի հիդրոէլեկտրակայանի ամբարտակի պայթյունների և ավերածությունների մասին տեղեկատվությունը առաջին հերթին հայտնվեց ուկրաինական թելեգրամյան ալիքներում։ Դրանից հետո Նովայա Կախովկայի քաղաքապետ Վլադիմիր Լեոնտևը РИА Новости-ի հետ զրույցում հերքել էր այս տվյալները՝ դրանք անվանելով «անհեթեթություն», սակայն մեկ ժամ չանցած նույն գործակալությանը տված հարցազրույցում նա հայտարարել էր, որ Կախովկայի հիդրոէլեկտրակայանի վերին հատվածը ավերվել է գնդակոծության հետևանքով։ Նա նշել է, որ ամբարտակն ինքնին չի քանդվել։
