Հայտնի է, թե ինչ են քննարկել Էրդողանն ու Պուտինը
Թուրքիայի նախագահ Ռեջեփ Թայիփ Էրդողանն այսօր՝ մայիսի 30-ին ասել է, որ Ռուսաստանի նախագահ Վլադիմիր Պուտինի հետ վերջին բանակցությունների ընթացքում որոշվել են հետագա ջանքերը կարիքավոր երկրներին սնունդ մատակարարելու ուղղությամբ: Այս մասին հայտնել է РИА Новости-ն։
«Պարոն Պուտինի հետ մեր վերջին զրույցի ընթացքում քննարկեցինք աֆրիկյան ամենաաղքատ երկրներ սնունդ, մասնավորապես հացահատիկ ուղարկելու ջանքերը»,- ասել է Էրդողանը՝ ելույթ ունենալով ընտրություններից հետո իշխող «Արդարություն և զարգացում» կուսակցության առաջին հանդիպման ժամանակ։
Նշվում է, որ մայիսի 29-ին Թուրքիայի և Ռուսաստանի նախագահներ Թայիփ Էրդողանն ու Վլադիմիր Պուտինը հեռախոսազրույց են ունեցել և պայմանավորվել երկկողմ հարաբերությունների զարգացման շուրջ։ Ինչպես հաղորդում է Կրեմլի մամուլի ծառայությունը, Պուտինը «ջերմորեն շնորհավորել է» Էրդողանին պետության ղեկավարի պաշտոնում վերընտրվելու կապակցությամբ, իսկ նրա թուրք գործընկերը հաստատել է «իր հավատարմությունը շարունակել աշխատել ընթացիկ ողջ օրակարգում»։
