Կոսովոյի գործողությունները խաթարում են Սերբիայի հետ հարաբերությունները կարգավորելու ջանքերը․ Բլինքեն

ԱՄՆ պետքարտուղար Էնթոնի Բլինքենն ասել է, որ մասամբ ճանաչված Կոսովոյի Հանրապետության՝ քաղաքային շենքերը գրավելու գործողությունները խաթարում են Սերբիայի հետ հարաբերությունները կարգավորելու ջանքերը։ Բլինքենի հայտարարությունը հրապարակվել է Պետդեպարտամենտի կայքում։ 

«Միացյալ Նահանգները խստորեն դատապարտում է Կոսովոյի կառավարության գործողությունները՝ բռնի կերպով զավթելու մունիցիպալ շենքերը»,- ասվում է հայտարարության մեջ։ 

Ինչպես նշել է Բլինքենը, այդ քայլերը Կոսովոյի իշխանությունների կողմից ձեռնարկվել են Վաշինգտոնի և եվրոպական երկրների առաջարկություններին հակառակ։ 

«Այս քայլերը հանգեցրին լարվածության կտրուկ և անհարկի սրման», - ընդգծել է Պետդեպարտամենտը: 

Հայտարարության մեջ ասվում է, որ նման գործողությունները ազդեցություն կունենան ԱՄՆ-Կոսովոյի երկկողմ հարաբերությունների վրա։