ՌԴ դիրքորոշումն անփոփոխ է․ Պուտինը՝ ճանապարհների ապաշրջափակման և Լաչինի միջանցքի մասին

Ադրբեջանն առանց որևէ տարբերակի ճանաչում է Հայաստանի լիակատար ինքնիշխանությունն այն տարածքի նկատմամբ, որով անցնելու են տրանսպորտային երթուղիները: Այս մասին ասել է ՌԴ նախագահ Վլադիմիր Պուտինը Մոսկվայում ՀՀ վարչապետ Նիկոլ Փաշինյանի հետ երկկողմ հանդիպմանը։
 

Պուտինն ընդգծել է, որ տրանսպորտային ուղղությունների, հաղորդակցությունների ապաշրջափակման՝ և՛ երկաթուղային, և՛ ավտոմոբիլային ճանապարհների հնարավոր կառուցման վերաբերյալ ՌԴ դիրքորոշումն անփոփոխ է:
 

«Պետք է ասել, որ ադրբեջանական կողմն էլ հաստատում է, որ այդ առումով ոչ մի փոփոխություն չունի։ Նրանք առանց որևէ տարբերակի ճանաչում են Հայաստանի լիակատար ինքնիշխանությունը։ Եվ ինչ-որ կրկնակի, եռակի մեկնաբանություններն այն ամենի վերաբերյալ, ինչը կապված է տրանսպորտային հաղորդակցության հնարավոր ապաշրջափակման հետ, որևէ հիմք չունեն»,– ասել է նա։
 

Պուտինը վստահեցրել է, որ ՌԴ դիրքորոշումը չի փոխվել նաև Լաչինի միջանցքի վերաբերյալ։
 

«Դուք գիտեք, որ թե՛ մեր հայ բարեկամների, թե՛ Ադրբեջանի հետ քննարկումներում մենք միշտ այդ դիրքորոշումն ենք ունեցել և հիմա էլ ունենք։ Ամեն ինչ պետք է լինի մեր այդ եռակողմ հայտարարության տառին ու ոգուն համապատասխան»,– ասել է ՌԴ նախագահը։