Wildberries-ը ՀՀ խոշոր հարկատուներից է․ Քերոբյան
Wildberries-ը ՀՀ խոշոր հարկատուներից է և այս տարվա առաջին եռամսյակի տվյալներով՝ խոշոր հարկատուների ցուցակում զբաղեցնում է 20-րդ հորիզոնականը: Այս մասին ԱԺ-ում Կառավարության հետ հարցուպատասխանի ժամանակ ասել է ՀՀ էկոնոմիկայի նախարար Վահան Քերոբյանը՝ պատասխանելով իշխող խմբակցության պատգամավոր Կնյազ Հասանովի այն հարցին, թե ի՞նչ պայմաններով է ՀՀ-ում աշխատում Wildberries ընկերությունը և ՀՀ-ն ի՞նչ օգուտ ունի դրանից:
«Մենք համապատասխան կարգավորումներով այնպես ենք արել, որ օնլայն առևտրով զբաղվող ընկերությունները ԱԱՀ վճարեն Հայաստանում, որը մինչև այդ այդպես չէր և նրանք ունեին առավելություն ՀՀ-ում գործող այլ մանրածախ ընկերությունների նկատմամբ: Հիմա այդ առավելությունը չկա: Հիմա հակառակ պատկերն է: ՀՀ-ում մանրածախ առևտրով զբաղվող մի շարք ընկերություններ Թուրքիայից կամ Չինաստանից հարկային առումով ոչ այնքան թափանցիկ ճանապարհով աշխատող ընկերություններ են»,-ասել է նախարարը:
Քերոբյանը նաև շեշտել է, որ իրենք այս առումով ամեն ինչ արել են և Wildberries-ի և դրա նման այլ ընկերությունների համար ստեղծել են ՀՀ-ում հարկեր վճարելու պարտավորություն և այս առումով իրենց առաքելությունն ավարտված է:
