«В этой гостинице я хозяин»․ Աղազարյանը` ԱԺ-ում վիճաբանության պատճառների մասին
ՀՀ ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանը վստահեցնում է՝ ընդդիմադիրների հետ վիճաբանություն սկսվելուց առաջ հայհոյանք չի հնչել։
Լրագրողների հետ ճեպազրույցում Աղազարյանն ասել է, որ իրեն ուղղակի դուր չեկավ այն, որ ելույթից հետո էլ ընդդիմադիր Արթուր Սարգսյանը կանգնել է ու ասել` նայի՛ր աչքերիս մեջ։
«Ես էլ նստած էի անմիջապես իր դիմաց։ Պարտավոր եմ իմ ուժերի ներածին չափով հարգել ինստիտուտը և դիտողություն արեցի։ Ասացի՝ էստեղ թատրոն չի, նստեք ձեր տեղը»,- ասել է պատգամավորը։
Դիտարկմանը, թե Արթուր Սարգսյանն էլ ասում էր, որ իրեն ասել են «վեր ընկիր տեղդ», Աղազարյանն արձագանքեց, թե գուցե դա հետո է եղել, չի հիշում, սակայն հայհոյանք հաստատ չի հնչել։
Հարցին, թե դատավոր Արմեն Դանիելյանը կարող էր ինքն իրեն պաշտպանել, Աղազարյանը ռուսերեն պատասխանել է.
«Որովհետև в этой гостинице я хозяин: Այստեղ Ազգային ժողովն է, ինստիտուտ է, որի անդամը ես եմ, ես եմ պարտավոր պաշտպանել բոլորի շահերը: Այո՛, եկել, էստեղ բացատրություն էր պահանջում: ԱԺ-ն «ռազբորկեքի» տեղ չի»:
