ՏԵՍԱՆՅՈՒԹ. Սննդի անվտանգության ոլորտում կոմպրոմիսները պետք է չլինեն. Փաշինյան

Ես բարձրացրել եմ սննդամթերքի անվտանգության թեման, կոնկրետ թթվասերի հետ կապված, բոլոր փաստարկները եղել են նրա մասին, որ պետք չի տնտեսությանը վնասել: Այս մասին այսօր՝ մայիսի 24-ին, ԱԺ-ում հայտարարել է ՀՀ վարչապետ Նիկոլ Փաշինյանը՝ անդրադառնալով հարցին, թե ռուսական կողմից կաթնամթերքի արտահանման արգելքի պարագայում, անորակ կաթնամթերքը ում երեխաներն են ուտելու:

«Ես էլի հանձնարարականներ եմ տվել, որոնք կիսատ են կատարվել: Այս վերջին իրադարձություններն ինձ դրդում են, որ ես վերադառնամ այն նախնական կարգավիճակին եւ եթե մեզ պետք է գնալ եւ ԵԱՏՄ-ում կարգավորումները փոխել, մենք պետք է գնանք եւ դա կարողանանք անել:

Ես համաձայն եմ, որ սննդի անվտանգության ոլորտում կոմպրոմիսները պետք է չլինեն: Բայց եթե մեկ օրում փակենք, կարող է շատ մեծ  խնդիրներ ունենանք ընդհուպ սննդի անվտանգության առումով: Հետեւաբար, այո, հարցը լեգիտիմ է, մենք դա պետք է լուծենք, բայց մեկ գործողությունով դա անել հնարավոր չի լինի»,-ասել է նա:

ՔՊ-ական պատգամավոր Գուրգեն Արսենյանը նաեւ այլ խնդիր բարձրացրեց՝ նշելով.

 «Կան հավելումներ, որոնք չպետք է լինեն մեր սննդամթերքի մեջ, բայց օգտագործվում է:  Մենք պետք է որոշակի ժամանակ տանք եւ ասենք՝ էս օրից հետո ՀՀ-ում արգելվում է հավելումների օգտագործումը, որովհետեւ դա քաղցկեղածին է, դրա հետեւանքները շատ թանկ է նստելու: Դա երեխաներն են ուտում եւ մենք չենք կարող երեխաների հնարավոր մուտացիաները շուտ հասկանալ»:

Ի պատասխան Փաշինյանը նշել է.

 «2018 թվականին ես վերցրել եմ թթվասերը, ասել եմ՝ ինչ կա: Ինձ ասել են՝ կաթ չկա, կա սոյայի յուղ, այլ հավելումներ, որոնք մարդու առողջության համար վտանգավոր չեն: Այլ բան, որ դա թթվասեր չի: Չկա տենց բան, որ մենք գիտենք, որ մարդկանց համար վտանգավոր բան են վաճառում, եւ դա թույլ ենք տալիս:

Ես ասել եմ՝ չպետք է թողնենք, որ վրան գրվի թթվասեր:  Մենք պետք է ունենանք թթվասերի ստանդարտ: Դա միայն թթվասերի մասին չէ: Ո՞րն է շամպայն խմիչքը: Դա այն խմիչքն է, որ շամպայն տեսակի խաղողից է ստացված: Նույն խնդիրն ունենք կոնյակի հետ, դրա համար պետք է մինչեւ 2040 թվականը հրաժարվենք դրանից»:

Մանրամասները` տեսանյութում