Գնում ենք փուլային ճանապարհով․Անդրեասյանը` ակադեմիական քաղաքի մասին

ՀՀ կրթության, գիտության, մշակույթի և սպորտինախարարությունը ակադեմիական քաղաքի ստեղծման համար բանակցում է գերմանացի ճարտարապետների ներկայացրած առաջարկների շուրջ։ Այս մասին ԱԺ-ում կառավարության հետ հարցուպատասխանի ժամանակ նշել է ԿԳՄՍ նախարար Ժաննա Անդրեասյանը։

Դեռ ապրիլի վերջին գերմանացի ճարտարապետներ էին ժամանել Հայաստան, և այցի ընթացքում նրանք հնարավորություն ունեցան այցելել այն տարածքներ, որտեղ պլանավորվում է ակադեմիական քաղաք հիմնել։

«Այս տարի Հայաստան այցելած գերմանացի ճարտարապետների ուսումնասիրությունների հիման վրա արված առաջարկն արդեն ստացել ենք, թե ինչ ժամկետներում կարող են մշակել գլխավոր հատակագիծը։ Մենք գնում ենք փուլային ճանապարհով և առաջին փուլում առավել առաջնահերթ ենք համարել արվեստների կլաստերի կառուցման աշխատանքներ։ Այս պահին բանակցում ենք այդ առաջարկների շուրջ, որպեսզի մեզ համար ավելի հասկանալի և դետալային լինի ամեն ինչ»,- ասել է Անդրեասյանը։

Ներկայում առաջին փուլի աշխատանքների արժեքի վերաբերյալ կա հստակություն, բայց այդ մասին առաջիկայում կհայտնենք։

Նա ընդգծեց, որ զուգահեռաբար ձևավորվել է «Ակադեմիական քաղաք» հիմնադրամը, որը ծրագիրն իրականացնող կառույցն է, իսկ առաջիկայում էլ կստեղծվի հոգաբարձուների խորհուրդը, որը կառավարելու է հիմնադրամը։

Նախարարի պնդմամբ՝ կադաստրի կոմիտեն ամփոփել է ակադեմիական քաղաքի համար հատկացված գույքի գույքագրման գործընթացը։ Առաջիկայում կոնկրետ գույքը ակադեմիական քաղաքին ամրացնելու մասով որոշումներ կլինեն։

Անդրեասյանը հույս է հայտնել, որ արագ տեմպերով կկարողանան անցնել հետագա փուլերին։