ԱՄՆ-ն 31 M1 Abrams տանկ է նախատեսել ուկրաինացի զինվորականների ուսուցման համար
Միացյալ Նահանգները Գերմանիա է տեղափոխել 31 M1 Abrams տանկ՝ ուկրաինացի զինվորականների ուսուցման համար, երկուշաբթի ասել է Պենտագոնի խոսնակ Փեթ Ռայդերը։
«Ես կարող եմ հաստատել, որ 31 M1 Abrams տանկ են մատակարարվել Գերմանիա՝ ուկրաինական տանկային անձնակազմի հետագա ուսուցման համար»,- ասել է Ռայդերը ճեպազրույցում։
Նրա խոսքով՝ ակնկալվում է, որ տանկիստները կժամանեն Գերմանիա և կսկսեն մարզումները «առաջիկա մի քանի շաբաթվա ընթացքում»։
Ռայդերն ընդգծել է, որ ԳԴՀ-ին հանձնված մեքենաները նախատեսված են «հատուկ մարզումների համար, դրանք միշտ չէ, որ համապատասխանում են մարտական գործողությունների պահանջներին»։ Ռայդերը հիշեցրել է, որ տանկերը, որոնք ԱՄՆ-ն նախատեսում է մատակարարել Ուկրաինային, ներկայումս տեխնիկական սպասարկում են անցնում։
Ավելի վաղ հաղորդվել էր, որ Գերմանիայում գտնվող ամերիկացի զինվորականները ամռան սկզբին կսկսեն ուկրաինացի զինվորականներին մարզել M1 Abrams տանկերի շահագործման համար։
