Անդրանիկ Կարապետյանը նվաճեց փոքր ոսկի

Անդրանիկ Կարապետյանը հավասարը չունեցավ պոկում վարժությունում:

Երեւանում անցկացվող ծանրամարտի Եվրոպայի առաջնությունում 89 կգ քաշայինների պայքարում  Հայաստանի ներկայացուցիչը պոկում վարժությունում 178 կգ-ով սահմանեց Եվրոպայի ռեկորդ:

Աշխարհի բրոնզե մեդալակիր, Եվրոպայի չեմպիոն, 27-ամյա  Անդրանիկ Կարապետյանը պոկում վարժությունում պայքարը սկսեց 167 կգ-ով: Առաջին մոտեցումը հաջող կատարելուց հետո, Հայաստանի մարզիչները երկրորդ մոտեցման համար պատվիրեցին 173 կգ, որը եւս շատ վստահ կատարեց: Երրորդ մոտեցմամբ՝ Եվրոպայի չեմպիոնը պոկեց 178 կգ՝ 4 կգ-ով շրջանցելով աշխարհի չեմպիոն, Եվրոպայի կրկնակի փոխչեմպիոն, Բուլղարիան ներկայացնող Կառլոս Նասարին:

Այս վարժությունում Կարապետյանն արժանացավ փոքր ոսկե մեդալի:

89 կգ քաշային կարգի А խմբի մեկնարկում վնասվածքների պատճառով պայքարից հրաժարվեցին Եվրոպայի եռակի ու գործող չեմպիոն, աշխարհի եւ Օլիմպիական խաղերի բրոնզե մեդալակիր, իտալացի Անտոնինո Պիցոլատոն եւ Ալբանիայի ներկայացուցիչ Կրենար Շորաժը: Այս քաշային կարգում Անտոնիտո Պիցոլատոն ֆավորիտներից մեկն էր: 

Քիչ անց կմեկնարկի հրում վարժությունը: