ԱՄՆ-ում տրանսգենդերներին արգելել են մասնակցել կանանց դպրոցական մրցումներին
ԱՄՆ Կոնգրեսի Ներկայացուցիչների պալատը ընդդիմադիր հանրապետականների ուժերով ընդունել է օրինագիծ, որն արգելում է դպրոցներում կենսաբանորեն արական սեռ ունեցող տրանսգենդերներին մասնակցել կանանց կամ աղջիկների մրցումներին։
Նախաձեռնությունը, որի վրա նախագահ Ջո Բայդենն արդեն խոստացել է վետո դնել, հավանության է արժանացել 219 կոնգրեսականների ձայներով, դեմ են եղել 203-ը։
«Օրինագիծն այն անհատներին, որոնց կենսաբանական սեռը արական է եղել, արգելում է մասնակցել կանանց կամ աղջիկների համար նախատեսված դպրոցական մարզական ծրագրերին»,- նշվում է փաստաթղթի բացատրական գրառման մեջ։
Օրինագիծը կոչված է պաշտպանելու սպորտով զբաղվող աղջիկներին սեռը փոխած տղամարդկանց մրցակցությունից: Ընդ որում, օրինագիծը քիչ շանսեր ունի մտնելու Սենատ, որը գտնվում է դեմոկրատների վերահսկողության տակ։
