Եգիպտոսը գաղտնի պլանավորել է հրթիռներ մատակարարել Ռուսաստանին
Համաձայն ԱՄՆ հետախուզության գաղտնազերծված փաստաթղթի՝ Եգիպտոսի նախագահ Աբդել Ֆաթահ աս-Սիսին՝ Մերձավոր Արևելքում Ամերիկայի ամենամոտ դաշնակիցներից մեկը և ԱՄՆ-ի օգնության հիմնական ստացողը, վերջերս հրամայել է իր ենթականերին արտադրել մինչև 40,000 հրթիռ՝ մաքսանենգ ճանապարհով Ռուսաստան տեղափոխելու համար: Այս մասին գրում է The Washington Post-ը։
Հույժ գաղտնի փաստաթղթի մի մասը, որը թվագրված է փետրվարի 17-ին, ամփոփում է Սիսիի և Եգիպտոսի բարձրաստիճան զինվորականների միջև ենթադրյալ խոսակցությունները, ինչպես նաև նշվում է Ռուսաստանին հրետանային արկեր և վառոդ մատակարարելու ծրագրեր: Փաստաթղթում Սիսին պաշտոնյաներին հանձնարարում է գաղտնի պահել հրթիռների արտադրությունն ու մատակարարումը «Արևմուտքի հետ խնդիրներից խուսափելու համար»։
The Washington Post-ը փաստաթուղթը ստացել է գաղտնի ֆայլերի բազմաթիվ պատկերներից, որոնք տեղադրվել են փետրվար և մարտ ամիսներին գեյմերների շրջանում հայտնի Discord հարթակում: Փաստաթղթի մասին նախկինում չի հաղորդվել:
Նշվում է, որ բացահայտումը տեղի է ունենում այն ժամանակ, երբ Ռուսաստանը պատերազմում է Ուկրաինայի դեմ, և երկու կողմերն էլ ձգտում են համալրել սպառված զինանոցները:
«Եգիպտոսի դիրքորոշումն ի սկզբանե հիմնված է այս ճգնաժամին չներգրավվելու և երկու կողմերի հետ հավասար հեռավորություն պահպանելու պարտավորության վրա՝ միաժամանակ հաստատելով Եգիպտոսի աջակցությունը ՄԱԿ-ի կանոնադրությանը և միջազգային իրավունքին ՄԱԿ-ի Գլխավոր ասամբլեայի բանաձևերում»,- ասել է Եգիպտոսի արտգործնախարարության խոսնակ Ահմեդ Աբու Զեյդը՝ արձագանքելով փաստաթղթին և դրանում նկարագրված խոսակցությունների իսկությանը վերաբերող հարցերին։
«Մենք շարունակում ենք կոչ անել երկու կողմերին դադարեցնել ռազմական գործողությունները և հասնել բանակցային քաղաքական լուծման», - ասել է նա։
