Ադրբեջանի պաշտպանության նախարարությունը հաղորդագրություն է տարածել այսօր այդ երկրի կողմից ձեռնարկված սադրիչ գործողությունների հետևանքով կրած մարդկային կորուստների մասին։

Մասնավորապես, տարածված հաղորդագրության մեջ նշվում է, որ այսօրվա գործողությունների հետևանքով ադրբեջանական բանակի երեք զինծառայող է զոհվել։ Ադրբեջանի ՊՆ-ն, իր գործելաոճի համաձայն, այսօրվա սադրանքում մեղադրել է հայկական կողմին։ 

Միևնույն ժամանակ, ՀՀ ՊՆ-ն հրապարակել է կադրեր, որոնցում երևում է, թե ինչպես են ադրբեջանցի զինծառայողները մեքենայով մոտենում ՀՀ սուվերեն տարածքում ինժեներական աշխատանքներ իրականացնող հայ զինծառայողներին և կրակ բացում նրանց ուղղությամբ։ Ըստ ՀՀ ՊՆ-ի՝ ադրբեջանական սադրանքի հետևանքով հայկական կողմն ունի 4 զոհ և 6 վիրավոր։