«Արմենիա» հայկական ավիաընկերությունը փոխում է անունը
«Արմենիա» ավիաընկերությունը որոշել է փոխել իր անվանումը` ուղեւորներին շփոթմունքից զերծ պահելու համար. ավիաընկերությունը վերանվանվելու է «AIR DILIJANS»: Այս մասին ֆեյսբուքյան իր էջում տեղեկացնում է ավիաընկերությունը:
«Իր գոյության ընթացքում (ավելի քան 7 տարի) «Արմենիա» Ավիաընկերությունը ձեռք է բերել բարի համբավ` անվտանգ թռիչքների եւ օդանավում սպասարկման գերազանց մակարդակի համար:
Հաշվի առնելով, որ Հայաստանի Հանրապետությունում այս պահին գոյություն ունեն համահունչ անվանումներով մի շարք ընկերություններ, «Արմենիա» ավիաընկերությունը որոշել է փոխել իր անվանումը` մեր ուղեւորներին շփոթմունքից զերծ պահելու համար։
Որոշումը կայացվել է մեր ուղեւորների շահերից ելնելով, նրանց ժամանակը խնայելու եւ ավիաընկերության ծառայություններից օգտվելիս հարմարավետություն ապահովելու նպատակով:
Ուշադրություն դարձրեք, որ ավիաընկերության մնացած վավերապայմանները մնում են նույնը:
«Արմենիա» ավիաընկերության անվանափոխությունից առաջ ձեռք բերված ավիատոմսերը մնում են ուժի մեջ եւ փոփոխություններ չեն պահանջում:
«Արմենիա» ավիաընկերության ավիատոմսեր ունեցող բոլոր ուղեւորներին սիրով կսպասենք “AIR DILIJANS” օդանավում:
Մաղթում ենք Ձեզ Բարի թռիչք»,– նշվում է հաղորդագրության մեջ։
