Տու-22Մ3-ը կործանվել է Իրկուտսկի մարզում, անձնակազմը կատապուլտվել է

ՌԴ պաշտպանության նախարարությունը հայտնել է, որ Իրկուտսկի մարզում նախատեսված ուսումնամարզական թռիչքի ընթացքում Տու-22Մ3 ինքնաթիռը վայրէջքի մոտենալիս վթարի է ենթարկվել։

«Անձնակազմը կատապուլտացվել է։ Օդաչուների կյանքի և առողջության համար վտանգ չկա։ Գետնի վրա ավերածություններ չկան։ Ինքնաթիռը թռիչքն իրականացրել է առանց զինամթերքի»,- հայտնել է գերատեսչությունը։

«Ինքնաթիռի անկման վայրում աշխատում է ՌԴ Օդատիեզերական ուժերի գլխավոր հրամանատարության հանձնաժողովը»,- նշել են զինվորականները։

Իրկուտսկի մարզի նահանգապետ Իգոր Կոբզևը իր «Max» ալիքում հայտնել է, որ Տու-22Մ3-ը վայրէջքի մոտենալիս ընկել է Բոխանսկի շրջանում՝ Կամենկա գյուղից ոչ հեռու։

«Նախնական տվյալներով՝ անձնակազմը հասցրել է կատապուլտացվել։ Նրանց կենդանի վիճակում հայտնաբերել են տեղի բնակիչները։ Զոհեր և ավերածություններ չկան։ Անձնակազմի հետ արդեն աշխատում են բժիշկները, անհրաժեշտության դեպքում մարդկանց պատրաստ են տեղափոխել մարզկենտրոն»,- գրել է Կոբզևը։