ԱՄՆ-ն անհանգստացած է Կրեմլի հետ Մերձավոր Արևելքի որոշ երկրների համագործակցությամբ, որի միջոցով Ռուսաստանը կարողանում է չեզոքացնել հակառուսական պատժամիջոցների ազդեցությունը, հայտնում է Reuters-ը։

Նշվում է, որ այս հարցը բարձրացվելու է ԱՄՆ ֆինանսների փոխնախարար Բրայան Նելսոնի` հաջորդ շաբաթ տարածաշրջան կատարելիք այցի ժամանակ: Պաշտոնյան այցելելու է Թուրքիա, Օման և ԱՄԷ, որտեղ հանդիպելու է իր օտարերկրյա գործընկերների, ինչպես նաև բիզնեսի և ֆինանսական կառույցների ներկայացուցիչների հետ։ ԱՄՆ ֆինանսների փոխնախարարը մտադիր է զգուշացնել զրուցակիցներին, որ իրենց երկրներն ու կազմակերպությունները կարող են կորցնել մուտքն ԱՄՆ շուկա, եթե շարունակեն բիզնես վարել պատժամիջոցների տակ գտնվող սուբյեկտների հետ, իսկ այդ պատժամիջոցները կշարունակվեն և կուժեղացվեն։

Ըստ լրատվականի, սա ԱՄՆ-ի առաջին պահանջը չէ՝ կապված Ռուսաստանի և Թուրքիայի փոխգործակցության հետ։ Նմանատիպ առիթով անցյալ տարի Միացյալ Նահանգներն ուժեղացրեց ճնշումն Անկարայի վրա: Սպիտակ տունը դժգոհ է, որ Թուրքիան լավ չի հետևում Ռուսաստանի դեմ պատժամիջոցների սահմանափակումներին։