Բրազիլիայում ֆուտբոլիստների ավտոբուսն ընկել է կամրջից․ կան զոհեր և վիրավորներ
Բրազիլիական ֆուտբոլային թիմի ավտոբուսը ընկել է կամրջից, ինչի հետևանքով չորս մարդ է զոհվել, հայտնում է CNN Brasil-ը։
Ողբերգությունը տեղի է ունեցել Մինաս Ժեյրաս նահանգի Ալեն Պարաիբա քաղաքի մոտ՝ Բրազիլիայի ամենաերկար դաշնային մայրուղու՝ BR-116-ի վրա, որը միացնում է երկրի հյուսիս-արևելքը և հարավը։ Ավտոբուսը ընկել է 10 մետր բարձրություն ունեցող կամրջից։
Ավտոբուսում եղել են Ռիո դե Ժանեյրոյից «Esporte Clube Vila Maria Helena» երիտասարդական թիմի 28 խաղացողներ, ինչպես նաև 4 մարզիչ և վարորդը։ Ֆուտբոլիստները վերադառնում էին սիրողական մրցաշարից, որտեղ նախօրեին հաղթել էին մինչև 18 տարեկանների մրցաշարում և մինչև 16 տարեկանների մրցաշարում դուրս էին եկել եզրափակիչ։
Մահացածների թվում են 14-ից 17 տարեկան 3 դեռահասներ և 1 մեծահասակ, ևս 28 հոգի հոսպիտալացվել են տարբեր ծանրության վնասվածքներով։
