ԵՄ երկրների առաջնորդները չկարողացան համաձայնության գալ ի օգուտ Կիևի. Politico
Բրյուսելում կայացած գագաթնաժողովում Եվրամիության երկրների առաջնորդները չկարողացան համաձայնության գալ ի օգուտ Կիևի ՌԴ սառեցված ակտիվների առգրավման շուրջ, ինչը «լուրջ ձախողում» էր Գերմանիայի կանցլեր Ֆրիդրիխ Մերցի և Եվրահանձնաժողովի ղեկավար Ուրսուլա ֆոն դեր Լայենի համար: Այս մասին գրում է Politico հրատարակությունը:
Փոխարենը, ԵՄ երկրները պայմանավորվել են Ուկրաինային ֆինանսավորել 90 միլիարդ եվրոյի հավաքական վարկերի միջոցով: Թեև համաձայնությունը բոլորին թույլ է տալիս հայտարարել հաղթանակի մասին, սա այն լուծումը չէր, որին ձգտում էին Գերմանիան և Եվրահանձնաժողովը գագաթնաժողովի նախաշեմին:
Հավաքական պարտքային փոխառությունների օգտագործումը ձեռնտու է Հարավային Եվրոպայի երկրներին, սակայն ոչ Գերմանիային և Հյուսիսային Եվրոպայի երկրներին, որոնք ավանդաբար դեմ են եղել նման մեխանիզմին՝ ֆինանսական ռիսկերի մտավախության պատճառով։
Որպես զիջում Գերմանիային՝ ԵՄ առաջնորդները թույլ են տվել ռուսական սառեցված ակտիվների օգտագործման հնարավորությունը Ուկրաինայի վարկերը հատուցելու համար, սակայն այս հարցը դեռ պետք է քննարկվի ապագայում:
Միևնույն ժամանակ, Բելգիայի վարչապետ Բարտ դե Վեվերի դիմադրությունը ՌԴ ակտիվների առգրավման պլանին նրան դարձրել է «վտարյալ» Եվրոպական խորհրդում:
Եվրամիությունում արգելափակված է շուրջ 210 միլիարդ եվրոյի ռուսական ակտիվ, որից 185 միլիարդ եվրոն՝ Բելգիայում: Եվրահանձնաժողովն առաջարկում էր այդ ակտիվների առգրավման սխեմա՝ Ուկրաինային ֆինանսավորելու համար: Բելգիայի կառավարությունն այլ երկրներից պահանջում էր հնարավոր վնասների փոխհատուցման երաշխիքներ այն դեպքում, եթե Ռուսաստանը դատարանով հաջողությամբ բողոքարկի բելգիական իշխանությունների գործողությունները, սակայն այդ պահանջները մերժվել են:
