Պերուում իրավապահ մարմինների աշխատակիցների եւ հակակառավարական ցույցերի մասնակիցների միջեւ բախումների հետեւանքով զոհվածների թիվը հասել է 60-ի: 

Հարավամերիկյան երկրի շատ քաղաքներում բազմահազարանոց հակակառավարական ակցիաների մասնակիցները պահանջում են նախագահ Դինա Բոլուարտեի հրաժարականը, կալանքի տակ գտնվող նախկին նախագահ Պեդրո Կաստիլյոյի ազատ արձակումը, Կոնգրեսի լուծարումը եւ արտահերթ ընտրությունների անցկացումը: Հունվարի 22-ի առավոտյան ոստիկանությունը Լիմայի Սան Մարկոսի համալսարանում ձերբակալել է մոտ 200 ուսանողի ։ 

Իշխանությունները հայտնում են, որ բողոքի ցույցերին մասնակցելու համար Պերուի տարբեր քաղաքներից ժամանած ուսանողները ճամբար են հիմնել: Անցյալ տարվա դեկտեմբերի վերջին Պերուի Հանրապետության Կոնգրեսը քվեարկեց 2024 թվականի ապրիլին արտահերթ ընտրություններ անցկացնելու օգտին: Պեդրո Կաստիլյոն հեռացվեց իշխանությունից օրենսդիրների կողմից, ինչին ի պատասխան հայտարարեց Կոնգրեսի (խորհրդարանի) լուծարման և երկրում պարետային ժամ սահմանելու մասին:  Կաստիլյոն նաեւ հայտարարել է ինն ամսվա ընթացքում երկրի նոր Սահմանադրության նախապատրաստման մասին:  

Նշենք, որ Եվրամիությունը Պերուի կառավարությանը և քաղաքական գործիչներին կոչ է արել հրատապ միջոցներ ձեռնարկել երկրում հանգստությունը վերականգնելու համար, ասվում է ԵՄ արտաքին ծառայության խոսնակի հայտարարության մեջ։ Ավելի վաղ հաղորդվել էր, որ Պերուում շարունակվում են բողոքի ցույցերը, արգելափակված է 120 մայրուղի, զոհեր կան ոստիկանների և ցուցարարների շրջանում։