Զելենսկին կնոջ միջոցով նամակ է փոխանցել Չինաստանի նախագահին
Ուկրաինայի նախագահ Վլադիմիր Զելենսկին կնոջ միջոցով խաղաղության բանաձևի՝ իր առաջարկը պարունակող նամակ է փոխանցել Չինաստանի նախագահ Սի Ծինփինին՝ ակնկալելով անձնական պատասխան։
Ի պատասխան դրա, Չինաստանի արտգործնախարարության խոսնակ Վան Վենբինը նշել է, որ Պեկինն աշխատում է բանակցություններն առաջ տանելու ուղղությամբ։
«Ուկրաինական ճգնաժամի հարցում Չինաստանը միշտ ակտիվորեն աշխատել է խաղաղ բանակցությունները խթանելու համար»,- ճեպազրույցի ժամանակ ասել է Վան Վենբինը։
Ավելի վաղ Զելենսկու գրասենյակի ղեկավար Անդրեյ Երմակը հայտարարել էր, որ Կիևը հույսը դնում է Ռուսաստանի դեմ Չինաստանի հետ համագործակցության հեռանկարի վրա և արդեն աշխատում է այդ հարցի վրա։
Ինքը՝ Չինաստանի Ժողովրդական Հանրապետության նախագահը, ընդգծել է, որ իր երկիրը աջակցում է խաղաղ բանակցությունների առաջխաղացմանը։
