Հայաստանը ժամանակ ունի երկարաժամկետ առճակատմանը պատրաստվելու․ Հակոբյան
Լեռնային Ղարաբաղի նախագահ Արայիկ Հարությունյանը պետք է կանխեր իր եւ պետնախարար Ռուբեն Վարդանյանի միջեւ ազդեցության ոլորտների բաժանման հարցը, երկուսին էլ կարելի է քննադատաբար վերաբերվել, քանի որ երկուսն էլ դա թույլ են տվել։ Հունվարի 17-ին կայացած քննարկման ժամանակ այս մասին ասել է «Հայրենիք» կուսակցության մամուլի քարտուղար Սոս Հակոբյանը։
Նա անընդունելի համարեց Ղարաբաղում ընտրությունների անցկացումը, քանի որ դա կհանգեցնի պետական համակարգի ոչնչացման գործընթացի մեկնարկին։
Վարդանյանի գործունեությունը գնահատելու համար, նրա խոսքով, ժամանակ է պետք. «Կարծում եմ, որ Լեռնային Ղարաբաղի եւ Հայաստանի իշխանությունները պետք է ավելի շատ գործով զբաղվեն, քան սոցիալական ցանցերում նստեն»,- ընդգծել է Հակոբյանը։
Նրա կարծիքով՝ Լաչինի միջանցքը հեշտությամբ չի բացվի։ Նա կոչ արեց պատրաստ լինել երկարաժամկետ առճակատման, իսկ զիջումը կարող է հանգեցնել անդառնալի հետեւանքների։
«Հայրենիք» կուսակցության մամուլի խոսնակը նշեց, որ դժգոհություն կա ռուս խաղաղապահներից, քանի որ ամեն ինչ այնպես չէ, ինչպես պետք է լիներ։
«Բայց մենք հասկանում ենք, որ Լեռնային Ղարաբաղում քիչ թե շատ ապահովված է կյանքի իրավունքը։ Հայաստանը ժամանակ ունի երկարաժամկետ առճակատմանը պատրաստվելու, լուծումներ փնտրելու եւ իշխանափոխության համար»,- ասել է Սոս Հակոբյանը։ Նա ընդդիմության համար առաջին խնդիր անվանեց իշխանափոխությունը։
«Հայրենիք» կուսակցության մամուլի քարտուղարը կարծում է, որ Հայաստանի իշխանությունները ոչինչ չեն անում Ադրբեջանի կողմից նոր ագրեսիայի ռիսկերը զսպելու համար։
«Արդյո՞ք Հայաստանը նոր դաշնակիցներ ձեռք բերեց։ Հայաստանի վարչապետ Նիկոլ Փաշինյանը եւ նրա թիմը ակտիվորեն փորձում են դուրս բերել Ռուսաստանին Հարավային Կովկասից»,- հավելել է նա։
Հակոբյանը կասկած հայտնեց, որ այլընտրանքային Ռուսաստանը այսօր Հայաստանի համար աշխարհաքաղաքական ուժ է։ «Եթե պաշտոնական Երեւանը ցանկանում է մտերմանալ Անկարայի հետ, ապա դա կհանգեցնի Թուրքիայի կողմից Հայաստանի օկուպացիային, քանի որ հենց Թուրքիան է հովանավորել 44-օրյա պատերազմի ժամանակ Լեռնային Ղարաբաղի դեմ ագրեսիան»,- եզրափակել է նա։
Նշենք, որ «Հայրենիք» կուսակցությունը գլխավորում է Հայաստանի ԱԱԾ նախկին տնօրեն Արթուր Վանեցյանը։
