Իրանում մահապատժի է դատապարտվել երկրի ՊՆ նախկին փոխնախարարը

Իրանի պաշտպանության նախկին փոխնախարար Ալիռեզա Աքբարին, որը մեղադրվում է բրիտանական հետախուզության համար լրտեսելու մեջ,  մահապատժի է դատապարտվել։ Այս մասին հայտնում է BBC-ն՝ հղում կատարելով նրա հարազատներին։

Նախկին պաշտոնյայի կինը լրագրողներին պատմել է, որ Իրանի իշխանությունները վերջերս կապվել են իր հետ և խնդրել իրեն գնալ բանտ՝ ամուսնու հետ վերջին հանդիպմանը։  Բացի այդ, Աքբարին տեղափոխվել է մեկուսարան, ինչը կարող է վկայել նաև մահապատժի անխուսափելիության մասին։

Նշվում է, որ Աքբարին երկու քաղաքացիություն ունի՝ բրիտանական և իրանական։  2019-ից 2020 թվականներին պաշտոնյան ձերբակալվել է և մեղադրվել Բրիտանիայի օգտին լրտեսելու մեջ:

Ինքը՝ Աքբարին, հերքել է բոլոր մեղադրանքները և ասել, որ ուժայինները փորձել են խոշտանգումների միջոցով իրենից խոստովանություն պոկել։  Պաշտոնյայի ճակատագրին Լոնդոնում շարունակում են հետևել, քանի որ Իրանի նախկին փոխնախարարն ունի բրիտանական քաղաքացիություն։  

«Մեր առաջնահերթությունը շարունակում է մնալ նրա անհապաղ ազատ արձակումը։  Մենք կրկին հարցում ենք ուղարկել հրատապ հյուպատոսական մուտքի համար», - նշել են Մեծ Բրիտանիայի ԱԳՆ-ում:

Ավելի վաղ հաղորդվել էր, որ Իրանի Սպահան նահանգի դատարանը մահապատժի է դատապարտել երեք ցուցարարների՝ նրանց մեղադրելով ոստիկանների սպանության մեջ։

Ըստ կառավարամետ Tasnim հրատարակության՝ 2022 թվականի նոյեմբերի 25-ին մեղադրյալները, նախապես համաձայնության գալով, սպանել են երեք ոստիկանի Սպահանում տեղի ունեցած անկարգությունների ժամանակ։