«Երրորդ համաշխարհային պատերազմ չի լինի, մենք կկանգնեցնենք ռուսական ագրեսիան մեր հողի վրա». Զելենսկի

Ուկրաինայի նախագահ Վլադիմիր Զելենսկին հրավիրվել է «Ոսկե գլոբուս» մրցանակաբաշխությանը։ Նա ԱՄՆ-ում անցկացվող միջոցառմանը մասնակցել է վիրտուալ կապի միջոցով: Այդ մասին գրում է Variety-ն։

Միջոցառման ժամանակ Զելենսկուն ներկայացրել է հոլիվուդյան օսկարակիր դերասան-ռեժիսոր Շոն Փենը, որը նախորդ նոյեմբերին Կիևում հանդիպել էր Զելենսկու հետ՝ հայտնելու իր աջակցությունը երկրին:

Այնուհետև Զելենսկին ձայնագրված ուղերձով դիմել է ներկաներին:

«Հիմա 2023 թվականն է… Առջևում դեռ մարտեր և արցունքներ կան, բայց հիմա էլ կարող եմ վստահաբար ասել, թե ով էր այս տարի լավագույնը. նրանք ազատ աշխարհի ազատ մարդիկ են: Նրանք, ովքեր համախմբվեցին ազատ ուկրաինացի ժողովրդին աջակցելու շուրջ՝ ազատության համար մեր ընդհանուր պայքարում»:

Ներկաները ծափահարել են։

«Երրորդ համաշխարհային պատերազմ չի լինի, սա եռերգություն չէ: Ուկրաինան կկանգնեցնի ռուսական ագրեսիան մեր հողի վրա», - եզրափակել է Զելենսկին։