Սաակաշվիլին հիմա շատ վատ վիճակում է․ մայրը հայտնել է, որ որդին չի կարողանա մասնակցել դատական նիստին
Սաակաշվիլին հիմա շատ վատ վիճակում է և նույնիսկ տեսակապով չի կարող մասնակցել դատական նիստին, նրա հետ ամեն ինչ կարող է պատահել։ Այս մասին լրագրողներին ասել է քաղաքական գործչի մայրը՝ Գյուլի Ալասանիան։
Նշենք, որ այսօր՝ հունվարի 9-ին, Թբիլիսիի քաղաքային դատարանում կընթանա Վրաստանի երրորդ նախագահ, այժմ անազատության մեջ գտնվող Միխեիլ Սաակաշվիլիի պատժի հետաձգման խնդրով հերթական դատական նիստը:
«Նա շատ վատ է, մարմնի մեջ թույն կա։ Եվ քանի դեռ թույնը չի հանվել մարմնից, նրա հետ ամեն ինչ կարող է պատահել»,- ասել է գործչի մայրը։
Միաժամանակ Սաակաշվիլիի մայրը հույս է հայտնել, որ դատարանը կբավարարի Վրաստանի նախկին նախագահի կարիքները։
Սաակաշվիլիի առողջական վիճակի պատճառով պատիժը հետաձգելու հարցով դատարանն արդեն որպես վկա հարցաքննել է ամերիկացի թունաբանին, «Վիվամեդ» կլինիկայի նյարդաբանին և ամերիկացի հոգեբույժին։
