Իրանում բանտից ազատ կարձակվի 3000 մարդ
Իրանի Գերագույն դատարանի նախագահ Ղոլամ Հոսեյն Մոհսենի-Էջեին երկուշաբթի հայտարարել է, որ 3000 բանտարկյալներ, այդ թվում՝ բանտարկված ցուցարարներ, ազատ կարձակվեն։ Նրա խոսքերը մեջբերում է Mehr գործակալությունը, գրում է ТАСС-ը։
«Շնորհակալ եմ իմ գործընկեր դատավորներին, ովքեր կարճ ժամանակում անհրաժեշտ հիմնավորում են ներկայացրել ամբողջ երկրում գրեթե 3000 մարդու կալանքից ազատելու համար»,- ասել է Գերագույն դատարանի նախագահը` ելույթ ունենալով Բարձրագույն դատական խորհրդի նիստում։
Նրա խոսքով, նրանց թվում կան ակտիվիստներ, ովքեր մասնակցել են վերջին անկարգություններին, ովքեր «զղջացել են և ազատ կարձակվեն»։
Դեկտեմբերի 28-ին Իրանի նախագահ Էբրահիմ Ռաիսին մեղադրել է ԱՄՆ-ին և արևմտյան երկրներին Իրանում հակակառավարական ցույցերը հրահրելու մեջ՝ տարածելով լուրեր և ապատեղեկատվություն։ Նրա խոսքով՝ «իսլամական հեղափոխության թշնամիները չկարողացան հասնել իրենց նպատակներին եւ պառակտել Իրանի ժողովրդին»։
