Իրանի արտգործնախարարության խոսնակը չի հերքել Ադրբեջանի հետ տարաձայնությունների առկայությունը

«Իրանն ու Ադրբեջանը երկու հարեւան երկրներ են։ Նրանք ունեն երկար ընդհանուր սահմաններ, և կա ընդհանուր շահերից բխող քաղաքական համագործակցություն»։

Այս մասին այսօր ամենշաբաթյա մամուլի ասուլիսի ժամանակ հայտարարել է Իրանի արտգործնախարարության խոսնակ Նասիր Քենանին, հաղորդում է ԱՊԱ-ի Թեհրանի բյուրոն։

«Մենք գտնում եք, որ երկու երկրների միջև որոշ տարաձայնությունները պետք է լուծվեն բանակցային ճանապարհով։ Ադրբեջանական կողմը այդ ուղղությամբ դրական քայլեր կատարել է։ Իրանը ևս, ինչպես նախկինում, այդ ուղղությամբ քայլեր է ձեռնարկում»,- ըստ «Թուրան» գործակալության, այսօր ասել է Իրանի արտգործնախարարության խոսնակը։ 

Միաժամանակ նա հերքել է պնդումները, թե Բաքվի ու Թեհրանի հարաբերությունները սառն են, նշելով, որ չնայած որոշ թյուրըմբռնումներին՝ Իրանի ու Ադրբեջանի միջև հարաբերությունները նորմալ են։

Նշենք, որ այս ֆոնին Իրանի նախագահ Էբրահիմ Ռայիսին կայցելի Թուրքիա:

Իրանի նախագահը Թուրքիա է այցելելու Թուրքիայի նախագահ Ռեջեփ Թայիփ Էրդողանի հրավերով: Քենանին իր խոսքում ընդգծել է, որ Իրանի և Թուրքիայի հարաբերություններն ամենաբարձր մակարդակի վրա են: