Սերբիայում գնացքի վթարից հետո ավելի քան 50 մարդ թունավորվել է ամոնիակով
Սերբիայի հարավ-արևելքում դեկտեմբերի 25-ին ռելսերից դուրս է եկել ամոնիակով բեռնված գնացք: Վթարը հանգեցրել է ավելի քան 50 մարդու թունավորման, հայտնում է Agence France-Presse-ը՝ վկայակոչելով տեղի իշխանություններին։
Պիրոտ քաղաքի քաղաքապետ Վլադան Վասիչի տեղեկություններով՝ ամոնիակի արտահոսքի պատճառով գրանցվել է «թունավորման 51 դեպք»։
«7 մարդ տեղափոխվել է Նիս քաղաքի հիվանդանոցներից մեկը»,- ասել է քաղաքապետը։
Սերբիայի ոստիկանությունը հայտնել է, որ երեկոյան գնացքը ռելսերից դուրս է եկել, ինչի պատճառով ամոնիակի արտահոսք է տեղի ունեցել և մեծ քանակությամբ գազ արտանետվել մթնոլորտ։
Իշխանությունները տեղի բնակիչներին խնդրում են չլքել իրենց տները։
