Դոնեցկի հյուրանոցի գիշերային գնդակոծության հետևանքով երկու մարդ է մահացել, վիրավորվել է նաև Ռուսաստանի նախկին փոխվարչապետ, «Ռոսկոսմոս»-ի նախկին ղեկավար Դմիտրի Ռոգոզինը, ով այժմ ղեկավարում է «Ցարսկիե վոլկի» («Թագավորական գայլեր») ռազմական խորհրդատուների խումբը։ 

Առաջին կադրերն են հայտնվել Դոնեցկի ռեստորանից, որտեղ դեպքը տեղի է ունեցել: «Վերք ունեմ, 3x4 մմ չափի մետաղական բեկոր է մտել աջ թիակիս մեջ։ Պետք է վիրահատվեմ։ Ինձ հարազատ մի քանի հոգի վիրավորվել են»։

Նրա խոսքով՝ ամեն ինչ տեղի է ունեցել նեղ շրջանակում անցկացված աշխատանքային հանդիպման ժամանակ։ «Վերջին ամիսներին մենք ապրում ենք այս հյուրանոցում, և ութ տարի է, ինչ թշնամին երբեք չի գնդակոծել այս վայրը։ Ինչ-որ մեկը տեղեկություն է փոխանցել, և ժամը 19:45-ի սահմաններում մի քանի բարձր ճշգրտությամբ հարվածներ են եղել, այդ թվում՝ հենց այն վայրին, որտեղ ուղղակիորեն գտնվում էինք»։