«Ես հրաժարական կտամ ղեկավարի պաշտոնից, հենց որ գտնեմ այն հիմարին, ով կհամաձայնի ստանձնել այս աշխատանքը». Մասկ
Twitter-ի նոր սեփանականատեր Իլոն Մասկը համաձայնել է Twitter-ի օգտատերերի քվեարկության արդյունքներին և հայտարարել, որ հեռանալու է ընկերության ղեկավարի պաշտոնից։ Բայց միայն իրավահաջորդ գտնելուց հետո։
«Ես հրաժարական կտամ ղեկավարի պաշտոնից, հենց որ գտնեմ այն հիմարին, ով կհամաձայնի ստանձնել այս աշխատանքը։ Դրանից հետո ես կշարունակեմ ղեկավարել միայն ծրագրային ապահովման և սերվերների թիմերը»,- գրել է նա իր կազմակերպած հարցման մեկնաբանությունում:
Ինքը՝ Մասկը, անցած կիրակի հրավիրել էր օգտատերերին պատասխանել այն հարցին, թե արդյոք նա պետք է ղեկավարի իր գնած սոցիալական ցանցի ընկերությունը։ Եվ նա խոստացավ անել այնպես, ինչպես կորոշի ինտերնետ համայնքը: Քվեարկությանը միացել է 17,5 միլիոն օգտատեր։
Արդյունքում՝ հարցման մասնակիցների մեծ մասը՝ 57,5%-ը, կողմ է եղել, որ Մասկը հրաժարվի Twitter-ի քաղաքականությունը կառավարելու փորձերից։
