Նոր փուլ. ԵՄ-ն «անցումային» թիմ կգործուղի Հայաստան. Բորել
Հոկտեմբերին Հայաստան ուղարկված ԵՄ մոնիթորինգային առաքելությունն այսօր լրացրել է իր մանդատը, հայտնել է ԵՄ Խորհրդի մամուլի ծառայությունը:
Նշվում է, որ Հայաստանի, Ադրբեջանի, Եվրոպայի խորհրդի և Ֆրանսիայի ղեկավարների միջև ձեռք բերված համաձայնության համաձայն՝ հոկտեմբերի 20-ին EUMCAP-ը տեղակայվել է Ադրբեջանի հետ միջազգային սահմանի հայկական կողմի երկայնքով՝ իրավիճակի մոնիթորինգի, վերլուծության և տեղում իրավիճակի մասին հաշվետվություններ ներկայացնելու նպատակով:
«Մոնիթորինգի նպատակով Հայաստանում 40 փորձագետների տեղակայումը արդյունավետ է եղել և նպաստել է վստահության ձևավորմանը։ Այսօր մենք սկսում ենք Հարավային Կովկասում ԵՄ փոխգործակցության նոր փուլ անցումային թիմի հետ, որը հող կնախապատրաստի Հայաստանում ԵՄ հնարավոր երկարաժամկետ առաքելության համար, որի վերջնական նպատակը տարածաշրջանում կայուն խաղաղության խթանումն է»,- ասել է ԵՄ արտաքին քաղաքականության և անվտանգության հարցերով գերագույն ներկայացուցիչ Ժոզեպ Բորելը:
Հաղորդվում է,. որ ԵՄ խորհուրդը Հայաստանի կառավարության հետ պայմանավորվել է, որ Վրաստանում ԵՄ մոնիթորինգային առաքելությունից Հայաստան կուղարկվի աջակցության խումբ, որը նախատեսված կլինի անցումային շրջանի համար:
«Ակնկալվում է, որ անցումային շրջանի պլանավորման աջակցության խմբին, ինչպես նաև Հայաստանի և Ադրբեջանի միջև ԵՄ միջնորդությանը կաջակցի Եվրոպայի խորհրդի նախագահ Շառլ Միշելը», – ասել է Բորելը։
