ՖԻՖԱ-ն հրաժարվել է հեռարձակել Զելենսկու ելույթը Աշխարհի առաջնության եզրափակչից առաջ
Ֆուտբոլի միջազգային ֆեդերացիան (ՖԻՖԱ) հրաժարվել է հեռարձակել Ուկրաինայի նախագահ Վլադիմիր Զելենսկու ելույթը Քաթարում կայանալիք աշխարհի առաջնության եզրափակիչ խաղից առաջ, հայտնում է CNN-ը՝ հղում անելով սեփական աղբյուրին։
Հեռուստաալիքի զրուցակիցը նշել է, որ ուկրաինացի առաջնորդի գրասենյակում զարմացել են Զելենսկու «խաղաղության ուղերձը» ցույց տալու մերժումից։
«Մենք կարծում էինք, որ ՖԻՖԱ-ն ցանկանում է օգտագործել իր հարթակը ընդհանուր բարօրության համար»,- հավելել է աղբյուրը՝ նշելով, որ բանակցությունները դեռ շարունակվում են։
Քաթարում ընթացող աշխարհի առաջնության եզրափակիչ հանդիպումը կանցկացվի դեկտեմբերի 18-ին։ Ֆրանսիայի և Արգենտինայի հավաքականները կպայքարեն գլխավոր գավաթի համար։
