ՏԵՍԱՆՅՈՒԹ․ Սա հարված է նաև ռուս խաղաղապահներին․ ինչպես են երեկվա միջադեպը մեկնաբանում Արցախում

Սա հարված է նաև ռուս խաղաղապահներին։ Ահա այսպես են արձագանքում Արցախի իշխանություննները՝ երեկ Գորիս-Ստեփանակերտ մայրուղին իբր բնապահպանական պատճառաբանությամբ փակած ադրբեջանցիների գործողությանը։ 

Նման համոզմունք է հայտնել  Արցախի Հանրապետության արտաքին գործերի նախարարի պաշտոնակատար Դավիթ Բաբայանը՝ անդրադառնալով ադրբեջանական հերթական սադրանքին: Նա նշել է, որ ադրբեջանցիների նմանատիպ սադրանքներից զարմանալ պետք չէ: Ավելի վաղ՝  միջադեպի վերաբերյալ հայտարարություն էր տարածել արտաքին գործերի նախարարությունը՝ կատարվածը որակելով ցեղասպանության տարր եւ միջազգային հանրությանը կոչ անելով զսպել ագրեսորին:

Հիշեցնենք, որ Արցախի տեղեկատվական շտաբը երեկ տեղեկություն հայտնեց, որ Շուշի-Քարին տակ խաչմերուկի հատվածում քաղաքացիական հագուստներով մի խումբ ադրբեջանցիներ բնապահպանական պատճառաբանությամբ փակել են Ստեփանակերտ-Գորիս մայրուղին:

«Ակնհայտ է, որ Ադրբեջանն այս քայլով դիմում է սադրանքի Հայաստանի և Արցախի միջև ցամաքային կապի ընդհատման և խաղաղ բնակչությանը հոգեբանական ահաբեկչության ենթարկելու համար:
Միջադեպի վերաբերյալ պատշաճ տեղեկացված է Արցախում տեղակայված ռուսական խաղաղապահ զորակազմի հրամանատարությունը: Արցախի լիազոր պետական մարմինները ձեռնարկում են բոլոր հնարավոր միջոցները իրավիճակի կարգավորման ուղղությամբ»,-նշվում էր հաղորդագրությունում:

Ռուս խաղաղապահների միջնորդությամբ 3 ժամ տևած բանակցություններից հետո ադրբեջանցիները բացել էին ճանապարհը։ 

Մանրմասները՝ տեսանյութում․