Եթե Մոսկվան դուրս գա «հացահատիկային գործարքից», ՌԴ-ն հացահատիկ կմատակարարի աղքատ երկրներին. Պուտին

 Եթե նույնիսկ Մոսկվան դուրս գա «հացահատիկային գործարքից», Ռուսաստանը պատրաստ է հացահատիկ մատակարարել ամենաաղքատ երկրներին, հայտարարել է ՌԴ նախագահ Վլադիմիր Պուտինը, փոխանցում է «ՌԻԱ Նովոստին»։

«Նույնիսկ եթե Ռուսաստանը դուրս գա այս գործարքից, մենք, ինչպես ավելի վաղ ասել ենք այս կապակցությամբ, պատրաստ կլինենք մատակարարել հացահատիկի ողջ ծավալը, որը մատակարարվել է Ուկրաինայի տարածքից ամենաաղքատ երկրների հասցեով։ Իսկ դա ընդամենը 4 տոկոս է»,- ասել է Պուտինը Անվտանգության խորհրդի մշտական անդամների հետ հանդիպմանը։

«Եթե մենք Ուկրաինայի կողմից իր պարտավորությունները խախտելու դեպքում դուրս գանք այս համաձայնագրից, մենք ողջ ծավալը, որ մինչ այժմ մատակարարվել է Ուկրաինայի տարածքից ամենաաղքատ երկրների հասցեով, կմատակարարենք անվարձահատույց, անվճար»,- հավելել է Պուտինը։

Թուրքիայի նախագահ Թայիփ Էրդողանն ավելի վաղ հայտնել էր, որ ՌԴ նախագահ Վլադիմիր Պուտինի հետ բանակցություններից եւ Թուրքիայի ու Ռուսաստանի պաշտպանության նախարարների բանակցություններից հետո պայմանավորվածություն է ձեռք բերվել «հացահատիկային միջանցքի» վերականգնման շուրջ։ Ռուսաստանի պաշտպանության նախարարությունը չորեքշաբթի հայտարարել է, որ Ռուսաստանը վերսկսում է մասնակցությունը պարենային գործարքին։

Հոկտեմբերի 30-ին Ռուսաստանը հայտարարել էր Ուկրաինայի նավահանգիստներից արտադրանքի դուրսբերմանը մասնակցությունը դադարեցնելու մասին։