Այսուհետ Ադրբեջանի ազգային գաղափարը «Ղարաբաղի և Զանգեզուրի վերածնունդն է. Ալիևի գրառումը
Հոկտեմբերի 6-ին Իլհամ Ալիևն իր Twitter-ում հայտարարել է, որ այսուհետ Ադրբեջանի ազգային գաղափարը «Ղարաբաղի և Զանգեզուրի վերածնունդն է»։
«Հետաքրքիր է, ինչպե՞ս կարձագանքի ԵՄ քաղաքացիական դիտորդական առաքելությունը հարավային Հայաստանը օկուպացնելու Ադրբեջանի հայտարարած մտադրությանը»,- նշում է ամերիկացի լրագրող Լինդսի Սնելը՝ մեկնաբանելով Հայաստան առաքելություն ուղարկելու ԵՄ որոշումը։
Ավելի վաղ՝ Պրահայի հանդիպումից հետո, լրագրողների հետ զրուցում Ադրբեջանի նախագահ Իլհամ Ալիևը նշել է, որ վաղ, թե ուշ Հայաստանը կտրամադրի անցում դեպի Նախիջևան։ Ալիևի խոսքով` երբ դիմել է Հայաստանի վարչապետին, թե վերջ ի վերջո իրենց պետք է տրամադրել ավտոմոբիլային ճանապարհ, կրկին պատասխան չի ստացել։
«Սա արդեն նույնիսկ ծիծաղելի չէ, որովհետև դա մեծ հատված չէ, բոլորը գիտեն, թե ոնց են անցնելու երկաթուղին, ավտոմոբիլային ճանապարհը։ Անհասկանալի է, կամավոր մեզ Նախիջևան մուտք տրամադրելու ցանկության բացակայությունը՝ խախտելով պարտավորությունները։ Բայց մենք դեռ պահպանում ենք համբերությունը, ես վստահ եմ, որ դրան նույնպես հասնելու ենք, բայց ցանկալի է շուտ»,-ասել է ագրեսոր երկրի ղեկավարը։
Ըստ Ալիևի, այդ հարցը կքննարկվի իր և Փաշինյանի՝ նոյեմբերին տեղի ունենալիք բրյուսելյան հանդիպմանը, ԱԳ նախարարների հանդիպմանը, սահմանազատման հարցերով այս ամիս Բրյուսելում նախատեսված հանդիպմանը։
