Ադրբեջանից վերադարձված վերջին 17 գերիներից քանիսն են շարունակում բուժում ստանալ. Ավանեսյանը մանրամասնում է
ՀՀ առողջապահության նախարար Անահիտ Ավանեսյանը Կառավարության նիստից հետո լրագրողների հետ ճեպազրույցում ասաց, որ Ադրբեջանից վերադարձված վերջին 17 գերիներից 7-ն առայժմ հիվանդանոցային բուժում են ստանում։
Ավանեսյանի խոսքով` մեր զինծառայողներն առայժմ գտնվում են ՊՆ հոսպիտալում և անհրաժեշտ բժշկական հետազոտություններից ու, եթե կարիք լինի, անհրաժեշտ բուժօգնության ընթացքն անցնելուց հետո դուրս կգրվեն։
Առողջապահության նախարարը նաև անդրադարձավ սեպտեմբերի 13-ից հետո ադրբեջանական նոր ագրեսիաների հետևանքով զոհված զինծառայողների մարմինների նույնականացման գործընթացին, և նշեց, որ այդ ուղղությամբ անհրաժեշտ հետազոտությունների ամբողջ գործընթացը դեռ ավարտված չէ։ Բայց արտասահմանյան հետազոտական կենտրոններ դիմելու կարիք, ըստ նրա, ներկա պահին չկա։
«Մեր մասնագիտական ներուժն ու տեխնիկական հագեցվածությունն ամբողջությամբ բավարարում են հետազոտությունները իրականացնելու համար։ Այո՛, որոշները դեռ ընթացքի մեջ են, և առաջիկայում կունենանք բոլոր հետազոտությունների պատասխանները»,– ասաց Ավանեսյանը: Վերջինս նաև ասաց, որ բացի այլ հետազոտություններից, ամբողջական պատկեր ստանալու համար նաև ԴՆԹ հետազոտություն է իրականացվում։
