Գանձասարի մոտ չի կարող լինել նման իրավիճակ. Արցախցի պատգամավորը՝ Գանձասարի մոտ «դիրքի հանձնման մասին»
Գանձասարի մոտ չի կարող լինել նման իրավիճակ: Այս մասին Auroranews.am-ի հետ զրույցում ասել է Արցախի ԱԺ պատգամավոր Մետաքսե Հակոբյանը:
«Ամեն դեպքում, Աստված մի արասցե, դեռ այս պահին չի կարող լինել»,- մեզ հետ զրույցում պատգամավորն այսպես է մեկնաբանել տարածվող տեղեկությունները, թե «Գանձասարի հատվածում 1 դիրք հանձնվել է թշնամուն»:
Ըստ պատգամավորի՝ Գանձասարը շփման գծից բավական հեռու է, և ադրբեջանական ուժերը այնտեղ հասնելու համար պետք է անցնեին մի քանի գյուղերով, ինչն այդպես չէ:
Մետաքսե Հակոբյանի խոսքով՝ տեղի ունեցողը Ադրբեջանին բնորոշ կեցվածք է, և կարող է պայմանավորված լինել առաջիկա հանդիպումներով: Իր խոսքով՝ վերջին շրջանում ադրբեջանցիները բավական ակտիվացել են:
Արցախի ԱԺ պատգամավորը նշել է, որ ընդհանուր առմամբ իրավիճակը լարված է, բայց արցախցիները խուճապի մատնված չեն:
Հիշեցնենք, որ համացանցում տարածվել է տեղեկություն այն մասին, թե «Գանձասարի հատվածում 1 դիրք հանձնվել է թշնամուն»: Նման ֆեյսբուքյան գրառում էր օգտատեր Արթուր Գրիգորյանը:
