Նույնիսկ Քիմ Քարդաշյանին էին հարցրել. Հրաչյա Սարգսյան
Երևանի քաղաքապետ Հրաչյա Սարգսյանն անցկացնում է գործակարգավարական խորհրդակցություն, որի մեկնարկին անդրադարձել է իր վերջին հայտարարության վերաբերյալ արձագանքներին: Հիշեցնենք, որ խոսքը Երևանի 12 վարչական շրջաննեում տեղադրված համակարգի մասին է, որը հնարավորություն է տալու ամեն առավոտ հնչեցնել Երևանի հիմնը: Նա ասել է, որ ուրախալի է, որ քաղաքացիները Երևանին մեծ պատասխանատվությամբ եմն վերաբերվում և Երևանում տեղի ունեցող իրադարձությունների մասին իրենց վերաբերմունքն են արտահայտում, դա շատ գովելի է համարել ու հավելել.
«Համոզված եմ, որ նույն ջանասիրությամբ համատեղ մեկս մյուսին նկատողություն ենք անելու փողոցում, ասելու ենք՝ խի եք աղբը թափում, կանգառը փչացնում»:
Ինչ վերաբերում է հայտարարությանը, մանրամասնել է, որ Երևանի աշտարակում ժամը մեկ 3-4 վայրկյան հնչում է Էրեբունի-Երևան Երևանի հիմնը՝ Էդգար Հովհաննիսյանի երաժշտությամբ և Պ. Սևակի բառերով:
«Վարչական շրջաններում տեղադրվել է համակարգ, որով այդ ղողանջները հնչում են, ես կարծում եմ, որ Երևանի համար դա լավ կոլորիտ է: Ինչ վերաբերում է նրան, որ զանգերը խանգարում են տարբեր մարդկանց, առավոտյան ժամը 7-ից արթնացնում է, հումորները շատ լավն էին, ճիշտն ասած: Նույնիսկ Քիմ Քարտաշյանին էին հարցրել, թե ինչ կարծիք ունի, հումորները շատ լավն էին: Մի բան կցանկանայի նշել, որ համակարգը իմ հայտարարությունից առաջ 25 օր է աշխատում էր, և վստահ եմ, որ իմ հայտարարությունից հետո մարդիկ նույն ձև արթնացել են և իրենց կյանքում շատ բան չի փոխվել, պարզապես հայտարարել եմ, որ աշխատում եմ»:
Հրաչյա Սարգսյանը շնորհակալություն է հայտարարել քաղաքացիներին, որ անտարբեր չեն Երևան քաղաքի նկատմամբ:
