Զախարովան մեկնաբանել է Բեգլարյանի հետ հարցազրույցից հետո Ադրբեջանում «РИА Новости» կայքի արգելափակումը
Այսօր ճեպազրույցի ժամանակ ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է Ադրբեջանում ՌԻԱ Նովոստիի կայքի արգելափակումը:
Վերջինիս ասել է, որ խնդիրները երկկողմանի կարգով են լուծվում։
«Ես միշտ ելնում եմ նրանից, որ զանգվածային լրատվամիջոցների ու դրանց գործունեության հարցերը պետք է լուծվեն երկու հիմնարար բաների հիման վրա՝ համապատասխանություն օրենքին ու խոսքի ազատության և լրագրողների իրավունքների նկատմամբ հարգանք, ինչն ամրագրված է ինչպես ազգային, այնպես էլ միջազգային իրավունքում», – նշել է Զախարովան:
ՌԴ ԱԳՆ պաշտոնական ներկայացուցչի խոսքով՝ գոյություն ունեցող և առաջացող խնդիրները Մոսկվան լուծում է գործընկերների հետ երկկողմանի ձևաչափով: Զախարովան հույս ունի, որ նման նախադեպերը հնարավորինս քիչ կլինեն։
«Ուզում ենք զարգացնել մեր հարաբերությունները նաև մեդիաոլորտում՝ ելնելով ֆեյքերին, ապատեղեկատվությանը հակազդելու ընդհանուր անհրաժեշտությունից։ Մենք աշխարհի բոլոր երկրների հետ միասին հավաքական հիմունքներով և ելնելով նշված սկզբունքներից, լուծելու բան ունենք»,-ասել է ՌԴ ԱԳՆ պաշտոնական ներկայացուցիչը։
Հիշեցնենք` ավելի վաղ Ադրբեջանում Ղարաբաղի պետնախարար Արտակ Բեգլարյանի հետ հարցազրույցի հրապարակման պատճառով արգելափակել էին ռուսական պետական գործակալության կայքը:
Ադրբեջանի ԱԳՆ-ն մեղադրել է ՌԻԱ Նովոստիին Լեռնային Ղարաբաղի հայտարարությունները տարածելու մեջ:
