Կենդանաբանական այգու դիմաց ծառեր են հատվել․ քաղաքապետարանից պարզաբանում են
Հայտնել էինք, որ բնապահպան Լևոն Գալստյանն ահազանգել էր այն մասին, որ Երևանի Մյասնիկյան փողոցում՝ Կենդանաբանական այգու դիմաց, ծառեր են հատվել։ Բնապահպանն ընդգծել էր, որ ծառերից երեքը հատվել էր դեռ նախորդ տարի, իսկ ահա այսօր մյուս երեքը նույնպես հատվել են։
Auroranews-ը կապ հաստատեց Երևանի քաղաքապետարան՝ հասկանալու, թե որն է եղել ծառերի հատման նպատակը և արդոք քաղաքապետարանը տեղյակ է եղել ծառերի հատման մասին։ Քաղաքապետարանից մեզ ասացին, որ անօրինական հատում է եղել և ոստիկանությունում այս մասին հաղորդում է ներկայացվել։
Կապ հաստատեցինք ՀՀ Ոստիկանության հասարակայնության և լրատվության բաժին, որտեղից մեզ ասացին, որ նշված դեպքով ոստիկանության Մարաշի բաժանմունքում հաղորդումը ստացվել է 18․07․2021թ-ին։
Նախապատրաստված նյութերով 28․07․2021թ․ հարուցվել քրեական գործ ՀՀ քր․ օր․-ի 296 հոդվածի հատկանիշներով և ուղարկվել է ՔԿ նախաքննություն իրականացնելու համար։
Auroranews-ը կապ հաստատեց նաև ՀՀ ՔԿ հասարակայունթյան և լրատվության բաժին, որտեղից ասացին, որ նշված գործով նախաքննություն է ընթանում։
