Ճամբարակում «պայքար է մղվում» ծղրիդների դեմ

Գեղարքունիքի մարզի Ճամբարակ խոշորացված համայնքի տարածքում արդեն մեկ ամիս է, ինչ պայքար է մղվում ծղրիդների դեմ, որոնց հոծ զանգվածները մասսայաբար ավերում են տնտեսությունների արոտները, խոտհարքերը եւ ցանքատարածությունները։

Ինչպես «Արմենպրես»-ին տեղեկացրեց Ճամբարակ համայնքի ղեկավարի տեղակալ Ռոբերտ Օհանյանը, ծղրիդներն աննախադեպ ակտիվացել են Ճամբարակ քաղաքի եւ Վահան գյուղի տարածքներում, իսկ մնացած բնակավայրերում առայժմ չեն տարածվել։

«Ծղրիդների հոծ խմբերն իրենց ճանապարհին խժռում են արոտները, խոտհարքերը եւ ցանքերը՝ լուրջ սպառնալիք ստեղծելով համայնքի գյուղատնտեսության համար։  Նրանց դեմ պայքար տանելու համար ՀՀ էկոնոմիկայի նախարարությունը մեզ տրամադրել է 30 կիլոգրամ թունաքիմիկատ, որը սակայն բավարար չեղավ՝ ծղրիդներին լիովին ոչնչացնելու համար, ուստի գնումների միջոցով որոշակի քանակի թունաքիմիկատ ձեռք  է բերել նաեւ ճամբարակի համայնքապետարանը։ 

Սրսկումներն իրականացնում ենք տրակտորների միջոցով։ Արդեն շուրջ 1000 հեկտար տարածք վնասազերծվել է վնասատու միջատներից, սակայն սպառնալիքը չի վերացել, քանի որ դրանց խմբերը հայտնվում են մյուս մաքուր տարածքներում։ Կարծում եմ, որ պայքարն ավելի արդյունավետ դարձնելու համար հարկավոր է ներգրավել դրոններ, որի հնարավորությունը մեր համայնքը չունի։ Հորդորել ենք նաեւ համայնքի բնակիչներին, որպեսզի ավելի ակտիվորեն ներգրավվեն ծղրիդների դեմ պայքարում»,-ներկայացրեց Ռոբերտ Օհանյանը։