Ինչու՞ պետք է Արևմտյան Զանգեզուրում ադրբեջանցիների համար կարգավիճակ չպահանջենք․ Ալիև
Հայաստանը կասկածի տակ է դնում Ադրբեջանի տարածքային ամբողջականությունը՝ ստիպելով ադրբեջանական կողմին անել նույնը։ Այս մասին IX գլոբալ Բաքվի համաժողովի բացման ժամանակ հայտարարել է Ադրբեջանի Հանրապետության նախագահ Իլհամ Ալիեւը։
Նրա խոսքով, պատմության տեսանկյունից Ադրբեջանը դա անելու ավելի շատ իրավունքներ ունի։ Որովհետև անցյալ դարի պատմությունը ցույց է տալիս, որ 1920 թվականի նոյեմբերին խորհրդային իշխանությունը վերցրեց Ադրբեջանի պատմական մասը՝ Զանգեզուրը և միացրեց Հայաստանին։
«Այդ իսկ պատճառով, եթե Հայաստանը Ղարաբաղի հայերի համար կարգավիճակ է պահանջում, ինչու՞ պետք է Արևմտյան Զանգեզուրում ադրբեջանցիների համար կարգավիճակ չպահանջենք, այս տարածքն ամբողջությամբ ադրբեջանցիներով էր բնակեցված»,- ընդգծել է պետության ղեկավարը։
Միևնույն ժամանակ Ալիևը նշել է, որ նման ճանապարհը տանում է դեպի փակուղի և կոչ է արել Հայաստանի կառավարությանը հրաժարվել Ադրբեջանի նկատմամբ տարածքային պահանջներից։
