Լատվիայում արգելել են ռուսական բոլոր հեռուստաալիքների հեռարձակումը

 Լատվիայում Էլեկտրոնային լրատվամիջոցների ազգային խորհուրդը (NEPLP) արգելել է ռուսական բոլոր հեռուստաալիքների հեռարձակումը։ Այս մասին հայտարարել է կազմակերպության նախագահ Իվարս Աբոլինսը, հայտնում է Delfi.lv-ն։

Նրա խոսքով՝ այս որոշումն ընդունվել է օրենսդրության նոր նորմի հետ կապված, որը նախատեսում է, որ Լատվիայում չեն կարող հեռարձակվել  «մի երկրում գրանցված հեռուստաալիքներ, որը սպառնում է այլ պետության անկախությանը և տարածքային ամբողջականությանը»։

Ինչպես նշում է թերթը, հեռարձակումն արգելելու որոշումն ուժի մեջ է մտնելու հունիսի 9-ից և ուժի մեջ կմնա այնքան ժամանակ «մինչև Ռուսաստանը դադարեցնի» հատուկ ռազմական գործողությունը  Ուկրաինայում «և վերադարձնի Ղրիմը»։

Ընդհանուր առմամբ, արգելվել է 80 ռուսական հեռուստաալիք։ Դրանցից են Illusion+, Kino24, Mir TV, Hunting and Fishing, Pepper, Russian Illusion եւ այլն։

Հիշեցնենք, որ փետրվարի 24-ին Լատվիայի էլեկտրոնային լրատվամիջոցների ազգային խորհուրդն արգելել էր «Россия», «Россия 24» և «TV Center» հեռուստաալիքների հեռարձակումը։ Այս որոշումն ընդունվել է Ուկրաինայում ռուսական ռազմական հատուկ գործողության անցկացման կապակցությամբ։ Մարտին Լատվիան օրենք է ընդունել տեղեկատվական տարածքի մաքրման մասին։