Թուրքիան զինվորականների միջոցով ԱՄՆ-ին չի տեղեկացրել Սիրիայի հյուսիսում գործողություն սկսելու ծրագրերի մասին. Պենտագոն
Պենտագոնի խոսնակ Ջոն Քիրբին հայտարարել է, որ ԱՄՆ-ը Թուրքիայից ռազմական ծանուցում չի ստացել Սիրիայի հյուսիսում նոր գործողություններ սկսելու մտադրության մասին։ Այս մասին հայտնում է РИА Новости-ն։
«Խորհուրդ կտամ կապ հաստատել Պետդեպարտամենտի հետ՝ պարզելու, թե արդյոք Թուրքիայի հետ դիվանագիտական շփումներ եղել են։ Ինչ վերաբերում է ինձ, ես տեղյակ չեմ Պենտագոնի որևէ բարձր մակարդակի շփման մասին՝ կապված Սիրիայի հյուսիսում ռազմական գործողություններ սկսելու թուրքական մտադրության հետ», - ասել է Քիրբին։
Ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր Սիրիայի հյուսիսում ռազմական գործողության մասին։ Գործողության նպատակը կլինի թուրք-սիրիական սահմանի երկայնքով 30 կիլոմետրանոց անվտանգ գոտի ստեղծելը։ Ներխուժումը կարող է թիրախ դարձնել քուրդ զինյալների կողմից վերահսկվող տարածքները:
ԱՄՆ արտաքին գործերի նախարարության մամուլի ծառայության ղեկավար Նեդ Փրայսի խոսքով՝ այս գործողությունը սպառնալիքներ է ստեղծում։
