Առջևում լինելու են բեկումնային զարգացումներ. «Միասնության թևեր»-ի հայտարարությունը

 Հայաստանում իրավիճակը դեռևս հեռու է հանգուցալուծումից։ Առջևում լինելու են ծանր, վճռորոշ և, հնարավոր է` բեկումնային զարգացումներ։ Այս մասին հայտարարություն է տարածել «Միասնության թևեր» կուսակցությունը` անդրադառնալով հետընտրական պրոցեսներին։

«Մեր հարաբերական լռությունը ո՛չ դադար է, ո՛չ նահանջ։ Սա այն փուլն է, երբ ամենակարևոր որոշումներն ու ամենաինտենսիվ աշխատանքը կատարվում են հրապարակային աղմուկից դուրս»,–գրել է կուսակցության պատգամավորի թեկնածու Դավիթ Անանյանը։

Նա տեղեկացրել է, որ այս պահին կենտրոնացած են ընտրական գործընթացների հետ կապված իրավական և քաղաքական լրջագույն աշխատանքների վրա՝ Երևանում և մի շարք մարզային ընտրատարածքներում վերահաշվարկներից մինչև առաջիկա զարգացումների բոլոր հնարավոր սցենարների գնահատում։

«Իսկ առաջիկա քաղաքական գործընթացներում մեր դերակատարումը պայմանավորված է լինելու ոչ միայն մեր քայլերով, այլև երկրում սպասվող ընդհանուր քաղաքական զարգացումներով։ Հետևաբար, այս փուլում առավել քան երբևէ անհրաժեշտ են սառնասրտություն, ներքին ամրություն, կազմակերպվածություն և պատրաստակամություն՝ պայքարի ցանկացած սցենարի համար»,–գրել է Անանյանը` հավելելով, որ պայքարը շարունակվում է։