«Երևանի գինու օրեր» փառատոնի ընթացքում արձանագրվել է ընդամենը 7 դեպք

Հունիսի 5-7-ը կայացած «Երևանի գինու օրեր» հոբելյանական 10-րդ փառատոնը համախմբել է աննախադեպ քանակի տեղացի և արտասահմանցի հյուրերի:

Արդեն ավանդական դարձած ամենամյա այս միջոցառման ավելի քան 180 հազար մասնակիցների անվտանգությունն ու հասարակական կարգի պահպանումն իրականացվել է ՆԳՆ ոստիկանության բոլոր հենասյունային ուղղությունների ծառայողների ուժեղացված հսկողության միջոցով, ինչի շնորհիվ ծանր հետևանքներով պատահարներ կամ լուրջ միջադեպեր չեն գրանցվել: 

Չնայած տոնական ակտիվ միջավայրին և մարդկանց աննախադեպ ներկայությանը, ոստիկանության պրոֆեսիոնալ ու համակարգված գործունեության արդյունքում փառատոնն ընթացել է անվտանգ ու խաղաղ:

Գրանցվել է ընդամենը 7 դեպք, որոնք հիմնականում վերաբերում են առերևույթ խուլիգանությանը և ֆիզիկական ներգործությանը: 

Հայաստանը միջազգային հեղինակավոր կառույցների գնահատականներով դասվում է աշխարհի ամենաապահով պետությունների շարքին, ինչը փոխկապակցված է նաև նմանատիպ բազմամարդ միջոցառումների անխոչընդոտ ու անվտանգ կազմակերպմամբ: