ՆԱՏՕ-ն Կիևի համար զենքի մատակարարման ոչ պաշտոնական սև ցուցակ ունի. DPA
Հյուսիսատլանտյան դաշինքի երկրների միջև ոչ պաշտոնական պայմանավորվածություններ կան Ուկրաինային զենքի որոշակի համակարգեր մատակարարելուց հրաժարվելու վերաբերյալ։ Այս մասին չորեքշաբթի հայտնել է գերմանական DPA գործակալությունը՝ հղում անելով ՆԱՏՕ-ի շրջանակներում աղբյուրներին։
Նրա խոսքով՝ ՆԱՏՕ-ի երկրների և Ռուսաստանի միջեւ ուղղակի ռազմական առճակատման ռիսկը պետք է նվազագույնի հասցվի։ Միաժամանակ նշվում է, որ դաշինքում մտավախություն կա, որ, օրինակ, Ռուսաստանը կարող է պաշտոնապես դիտարկել արևմտյան տանկերի և մարտական ինքնաթիռների մատակարարումը որպես հակամարտությանը մասնակցություն, ապա պատասխան ռազմական քայլեր ձեռնարկել։ Այս տիպի սպառազինության համակարգերը, ըստ DPA-ի, դեռ չեն մատակարարվել Ուկրաինա։
Իր հերթին, ըստ գործակալության, չորեքշաբթի ՆԱՏՕ-ի ներկայացուցիչը մեկնաբանել է այս տեղեկությունը միայն ընդհանուր ձևով։ Նա ընդգծել է, որ զենքի մատակարարման վերաբերյալ բոլոր որոշումները, ի վերջո, դաշինքի անդամ առանձին երկրների գործն են։ Դիվանագետներն ասում են, որ մինչ այժմ հավատարիմ են մնացել ոչ պաշտոնական պայմանավորվածություններին նաև այն պատճառով, որ հակառակ դեպքում նրանք պետք է վախենան, որ հարձակման դեպքում չեն ստանա իրենց դաշինքի գործընկերների ամբողջական աջակցությունը: Այդ պատճառով Լեհաստանը, օրինակ, ըստ DPA-ի, ավելի քան երկու ամիս առաջ ձեռնպահ էր մնում Կիևին խորհրդային արտադրության ՄիԳ-29 կործանիչներ մատակարարելուց։
Եզրափակելով՝ նշվում է, որ ՆԱՏՕ-ն մշտապես հետևում է Ուկրաինայում իրավիճակի զարգացմանը և վերանայում Կիևին զենքի մատակարարման հետ կապված հնարավոր ռիսկերը։ Այսպիսով, ինչպես նշում է DPA-ն, չի կարելի բացառել, որ ինչ-որ պահի Ուկրաինա կտեղափոխվեն ինչպես տանկեր, այնպես էլ կործանիչներ։
