«Պետք է երաշխավորենք Փաշինյանի ֆիզիկական անվտանգությունը»․ Վանեցյան

Հանրությունն ընդդիմությունից սպասում է այն մարդկանց անունների հրապարակումը, որոնք լինելու են Փաշինյանից հետո։ Այս մասին Ֆրանսիայի հրապարակում ունեցած իր ելույթում ասաց ԱԺ ընդդիմադիր «Պատիվ ունեմ» խմբակցության ղեկավար Արթուր Վանեցյանը, որը ընդդիմության շարժման ղեկավարներից է։

Վանեցյանը սրանով է բացատրում, որ հանրության ավելի լայն շերտերը չեն միանում պայքարին։ Վանեցյանն անուններ չտվեց, միայն վստահեցրեց, որ ընդդիմությունն ունի ներկայիս իշխանությունից մի քանի անգամ ավելի կադրային ռեզերվ։

«Ով կլինի հետագայում երկրի ղեկավարը կամ ումից կազմված կլինի կառավարությունը, կլուծվի ընթացքում»,- ասաց Վանեցյանը։

Ընդդիմության ներկայացուցիչը նաև անդրադարձավ հարցին, թե ինչ է լինելու Փաշինյանի հետ իշխանափոխությունից հետո։

«Ես և բոլորը պետք է երաշխավորենք Նիկոլ Փաշինյանի և այսօրվա իշխանության անդամների ֆիզիկական անվտանգությունը։ Այսինքն` մարդը պետք է իմանա, որ իրեն որևէ բան չի լինելու։ Բայց դրա հետ մեկտեղ, պետք է լինի քննություն, որի արդյունքում եթե կապացուցվի այս կամ այն անձի, այդ թվում` Նիկոլ Փաշինյանի մեղքը կատարված հանցագործությունների մեջ, նրանք պետք է պատժվեն»,- ասաց Վանեցյանը։

Նշենք, որ քիչ առաջ Երևանի Ֆրանսիայի հրապարակից մեկնարկեց ընդդիմության բողոքի հերթական ակցիան։

Մասնակիցները մի քանի խմբերով շարժվեցին տարբեր ուղղությաններով` իրականացնելու անհնազանդության այսօրվա ակցիաները։