Զելենսկին մեկնաբանել է Ադրբեջանի եւ Թուրքիայի դիրքորոշումն Ուկրաինայի հարցում
Ուկրաինայի նախագահ Վլադիմիր Զելենսկին մեկնաբանել է Ադրբեջանի եւ Թուրքիայի միջնորդական առաքելությունը բանակցային գործընթացում, հայտնում է TSN-ը։
Զելենսկու խոսքով՝ ինքը բանակցություններ է վարել երկու երկրների նախագահների հետ միջնորդական առաքելության շուրջ, այս մասին երկրի ղեկավարը խոսել է շաբաթ օրը օտարերկրյա եւ ուկրաինացի լրագրողների հետ մամուլի ասուլիսի ժամանակ։
Երկրի ղեկավարը նշել է, որ Թուրքիան բացահայտ հայտարարում է Ուկրաինայի անվտանգության երաշխավորների թվում լինելու իր պատրաստակամության մասին, մինչդեռ Ադրբեջանից նման հարցում դեռ չի ստացել։
«Մենք լավ հարաբերություններ ունենք Թուրքիայի եւ Ադրբեջանի հետ։ Բայց ես դա կկիսեի, քանի որ, ի վերջո, այժմ Թուրքիայում տեղի են ունենում մեր ենթախմբերի դիվանագիտական հանդիպումներ։ Թուրքիան ցույց է տալիս, որ ցանկանում է առաջատար լինել այն երկրների շարքում, որոնք պատրաստ են միջնորդ դառնալ։ Թուրքիան բացահայտ հայտարարում է, որ կլինի եւ ուզում է լինել անվտանգության երաշխավորների թվում։ Ես իսկապես դեռ նման բան չեմ լսել Ադրբեջանից»,- ասել է Զելենսկին։
Պետության ղեկավարը միաժամանակ ընդգծել է, որ Ադրբեջանը տարբեր կերպ աջակցում է Ուկրաինային։ Զելենսկու խոսքով՝ ուկրաինական կողմն Ադրբեջանից ինչպես մարդասիրական, այնպես էլ բժշկական օգնություն է ստացել։
«Բայց ուզում եմ ձեզ ասել, որ նախագահ Ալիեւը միշտ աջակցել է Ուկրաինային։ Եղել է մարդասիրական օգնություն, եղել է բուժօգնություն։ Կարծում եմ՝ այսօր Ադրբեջանի համար դժվար է զենքի հարցում օգնել Ուկրաինային։ Սա կարելի է հասկանալ, քանի որ նրանք Լեռնային Ղարաբաղ ունեն։ Այո, սա պատմական եւ շատ բարդ խնդիր է։ Թերեւս սա այն քիչ երկրներից է, որի դեպքում մենք հասկանում ենք չեզոքության հավասարակշռությունը։ Ես հասկանում եմ, թե ինչու, քանի որ պատերազմ կարող է սկսվել հիմա: Բայց ամեն դեպքում մենք ավելին ենք սպասում՝ երկար հասկանալ չենք կարող»,- նշել է Ուկրաինայի նախագահը։
