Էստոնիայի և Լատվիայի խորհրդարաններն Ուկրաինայում Ռուսաստանի գործողությունները ցեղասպանություն են որակել. RTVI
Էստոնիայի և Լատվիայի խորհրդարանները հայտարարություններ են ընդունել՝ Ուկրաինայի տարածքում Ռուսաստանի գործողությունները ցեղասպանություն որակելով։ Սրանք աշխարհում առաջին նման փաստաթղթերն են, գրում է RTVI-ը:
Էստոնիայի Ռիյգիկոգուի (Խորհրդարանի) կայքում հրապարակված հայտարարության մեջ ասվում է, որ Ռուսաստանը «ցեղասպանություն է իրականացրել խաղաղ բնակչության նկատմամբ, այդ թվում՝ Բուչա, Բորոդյանկա, Գոստոմել, Իրպեն և Մարիուպոլ քաղաքներում, ինչպես նաև Ուկրաինայի բազմաթիվ այլ բնակավայրերում»:
«Դրանք (ցեղասպանության գործողությունները) ներառում են սպանություն, առևանգում, տեղահանություն, բանտարկություն, խոշտանգում, բռնաբարություն և դիակների պղծում», - ասվում է հայտարարության մեջ:
Նմանատիպ փաստաթուղթ է ընդունվել նաև Լատվիայի Սեյմի (խորհրդարանի) կողմից։ Դրանում նշվում է, որ երկիրը աջակցություն և համերաշխություն է հայտնում ուկրաինացի ժողովրդին, ինչպես նաև Ռուսաստանի գործողությունները համարում է Ուկրաինայի ինքնիշխանության և տարածքային ամբողջականության խախտում։
